دسو میں کون آں؟امر جلیل
رب دے میرے تے بڑے کرم تے مہربانیاں نیں۔ اوہدے کرماں وچوں اک کرم تے مہربانی ایہہ وی ہے کہ میری سنگت یاری دے وچ رلتی ہے شیطان تے فرشتیاں ورگے بندے، سیانے، ایانے تے مورکھ، ڈنگے تے سدھے، چنگے تے مندے، شوہدے تے شریف، کالے کامے تے گورے کامے، گرگٹ ورگے سیاستدان، بونگے وزیر تے اوہناں دے بونگے صلاح کار، لڑاکا، بڑبولے، چور، ڈاکو، رہبر تے اُستاداں دے اُستاد میری سنگت وچ نیں۔ میرے کجھ اجیہے سنگی وی نیں جیہناں دی شکل صورت ہوندیاں وی اوہناں دی کوئی شکل صورت نہیں۔ اوہ ہر تھاں موجود ہوندیاں وی کسے نوں وی نہیں لبھدے، کوئی وی اکھ اوہناں نوں تک نہیں سکدی۔ اوہناں دی ہوند دا گویڑ تے لایا جا سکدا ہے پر اوہ ہر کسے دیاں اکھاں توں اوہلے ہوندے نیں۔ میں وی اوہناں نوں کدی کدائیں تکیا ہے۔ مینوں تے اینا وی نہیں پتہ کہ اوہ کیہڑے کم کردے نیں۔ مینوں تے بس اینا پتہ ہے کہ ہر کوئی اوہناں کولوں ڈردا ہے،اوہناں توں یرکدا ہے، اوہناں توں ہر بندہ تھر تھر کمبدا ہے۔ اک واری میں اپنے پراسرار سنگی کولوں پچھیا سی کہ “یار، توں میرے بارے وچ سب کجھ جان دا ایں کہ میں کیہدا چمچا آں، کیہنوں کیہنوں مسکا لاؤندا ہاں، کیہدی چمچہ گیری کردا ہاں تے کیہدی تیل مالش کردا ہاں، پر میں تے تیرے بارے کجھ وی نہیں جان دا، میں تاں اینا وی نہیں جان دا کہ توں کون ایں، تیری شکل تے پرچھاواں کنج دا ہے، توں کیہ کردا ایں؟”
“مینوں پتہ سی کہ توں اک نہ اک دن ایہہ سوال ضرور پچھیں گا” اوہنے آکھیا، کھلو میں تینوں اپنے کارنامیاں دا کالا چٹھا یعنی لسٹ کھول کے سناناں۔ اوہدے توں مگروں آپوں فیصلہ کریں کہ میں کون آں۔”
“میں بڑا سیانا، مکار تے ہشیار آں۔ بُجھارتاں سُلجھاون وچ ماہر آں۔” میں آکھیا، توں مینوں اپنے کارنامیاں دے بارے دس تے میں تینوں دساں گا کہ توں کون ایں۔”
“تاں پھیر کناں وچوں میل کڈھ تے کن کھول کے سُن” اوہنے اپنے کارنامیاں دے کالے چٹھے کھولدیاں ہویاں آکھیا۔ “لہور وچ سری لنکا دی کرکٹ ٹیم تے دھاڑے دی منصوبہ بندی میں تے میرے سنگیاں نے کیتی سی تے اوہدے تے عمل وی اسیں کروایا سی۔”
“کیہہ!” اوہدی گل سن کے میں بڑا حیران ہویا۔
“بینظیر بھٹو نوں وی اسیں اسمان ول گھلیا سی۔” پراسرار سنگی نے آکھیا، “بینظیر بھٹو دے پیو تے دوہاں بھراواں دا قصہ وی اسیں مُکایا سی۔”
“نہیں یار، بالکل نہیں!”اوہدیاں گلاں سُن کے مینوں بھوں چڑھن لگ پئے۔
اوہنے آکھیا حاکماں لئی پریزیڈنٹ ہاؤس تیکر ریڈ کارپیٹ اسیں وچھاندے آں۔”
“چھڈ یار!” اوہدیاں گلاں سُن کے میرا لوں لوں کنب رہیا سی۔
“چپ چاپ میرے کارنامے سُن۔” اوہنے آکھیا۔
“بے حساب جھول جھال (گھپلے) کرکے وی جنرل پرویز مشرف ساڈی کرپا تے مرضی نال ایس ملک وچ موجود ہے۔”
اوہدیاں گلاں سُن کے میرا سنگھ سُک گیا سی۔
اوہنے آکھیا، “پچھوکڑ وچ اک دوجے دے ویری نواز شریف تے آصف زرداری وی ساڈے منصوبے دی وجہ توں اک دوجے دے نیڑے آئے سن۔”
میں پچھیا، “تے ہُن؟”
اوہنے آکھیا، “اسیں ہی اوہناں دوہاں وچکار بے سوادی تے جھیڑا کروایا سی۔”
میں پچھیا، ” خورے معذور یاں معزول چیف جسٹس افتخار چوہدری تے وکیلاں دی چپ دے پچھےکیہدا ہتھ ہے؟”
اوہنے اچن چیتی آکھیا کہ”جھلیا، ساڈے توں اڈ کیہدا ہتھ ہوسکدا ہے؟” اوہنے آکھیا ایس ملک وچ پہلے دیہاڑے توں جو کجھ وی ہو رہیا ہے، وڈی یاں نکی واپری واپردی ہے، ساڈی مرضی تے منصوبیاں دے مطابق ہو رہیا ہے۔”
اوہدے مگروں اوہنے اپنے غیر معمولی کارنامیاں دے بارے جنے وی کالے چٹھے کھول کے سُنائے، جو کجھ وی دسیا اوہ سب کجھ سُن کے میرے کن کھل گئے، میں حیران تے پریشان رہ گیا، اوہدیاں گلاں سُن کے میں اپنے پرانے گناہ بھل گیا۔ میں چاہناں پئی میں اپنے اوس پراسرار سنگی دے کارنامیاں بارے تہانوں وی کجھ دساں جنہاں دے بارے سُن کے تسیں وی حیران رہ جانا اے۔ تہانوں چیتا ہونا اے کہ یاراں ستمبر اُنی سو اڑتالی نوں قائد اعظم محمد علی جناح نوں جدوں بماری دی حالت وچ کوئٹہ توں کراچی لیاندا گیا اودوں اوہناں دا سواگت کرن لئی ائرپورٹ تے کوئی وی بندہ نہیں سی آیا! اوس ویلے اوہناں دے وزیر اعظم سنے کئی ہور وزیر ایویکیو پراپرٹی یعنی ہندوواں دی چھڈی ہوئی ملکیت ونڈ رہے سن! ماڑی پور ائرپورٹ توں گورنر ہاؤس تیکر کھڑن لئی اک ٹُٹی بھجی ایمبولینس لیاندی گئی سی۔ ویران سڑک تے انجن خراب ہوون دا بہانہ کرکے ڈرائیور نے ایمبولینس کھلوا دتی سی۔ ایہہ کارنامے ساڈے پراسرار سنگی تے اوہدے سیانے سنگیاں دی منصوبہ بندی دا انگ سن۔ ساڈا مقصد ایہو ای سی کہ جناح نوں اوہدے متھے ہوئے ویلے تے مرن توں پہلاں ظاہر طور تے ماریا جاوے۔ اوہ اپنے مقصد وچ کامیاب نہیں ہوئے، دو ترے گھنٹیاں تیکر دوزخ ورگی دُھپ وچ ساڑ کے ادھ مویا کرکے محمد علی جناح نوں نماشیں ساڈھے چھ وجے گورنر ہاؤس لیاندا گیا جتھے چار گھنٹیاں توں مگروں راتیں دس وج کے ویہہ منٹ تے اوہ چلانا کرگئے۔
میں پچھیا۔ “ایہہ جیہڑے کراچی نوں شہر قائد اعظم دی تھاں تے شہر قائد آکھدے پئے نیں، ایہہ وی تیری ہی منصوبہ بندی ہے؟”
میری گل سُن کے اوہنے کڑکدے لہجے وچ آکھیا “بکواس نہ کر، توں فضول گلاں نہ پچھیا کر، اجیہیاں گلاں پچھ کے توں کسے رپھڑ وچ نہ پھس جاویں، توں چپ چاپ میرے کارنامے سُن کے دس کہ میں کون آں۔”
میں اپنا موڈ ٹھیک کرکے اوہدے حیرانی جوگ کارنامے سُنن لگ پیا۔ تہانوں اینا تے یاد ہووے گا کہ راولپنڈی دے اک جلسے وچ سید اکبر ناں دے اک بندے نے بنا چُنے ہوئے وزیر اعظم لیاقت علی خان نوں گولی ماری سی؟ تے سید اکبر دے پچھے بیٹھے ہوئے بندے نیں سید اکبر نوں کنڈ تے گولیاں مار کے تھاں تے ماردتا سی تے واردات کرکے گواچ گیا سی۔ایہہ کارنامہ وی ساڈے یار تے اوہدے سیانے سنگیاں دا سی۔جیویں اج تیکر کسے نوں پتہ نہیں کہ جناح نوں کیہدے حکم دی وجہ توں کھٹارہ ایمبولینس وچ کھڑیا گیا سی تے ایمبولینس دا ڈرائیور کون سی تے اوہنے کیہدے حکم تے شکر دوپہر نوں سڑک تے انجن خراب ہوون دا بہانہ کرکے ایمبولینس کھلاری سی تے انج ہی اج تیکر کسے نوں پتہ نہیں کہ کیہدے حکم تے سید اکبر نوں لیاقت دے نیڑے بٹھایا گیا سی! کسے نوں وی پتہ نہیں کہ سید اکبر نوں مارنے والا سیکرٹ ایجنٹ کون سی تے اوہ کیہدے اشاریاں تے کم کررہیا سی!
۵۶ ورہیاں مگروں بالکل اوسے ڈھنگ نال ساڈے سنگی تے اوہدے چلاک، مکار تے ہشیار سنگیاں نے بینظیر بھٹو نوں بھلک دے حکمراناں دے راہ وچوں کنڈے وانگوں صاف کیتا سی۔
مینوں حیران پریشان ویکھ کے میرے پراسرار سنگی نے پچھیا، “کیہہ سوچ رہیا ایں، مَٹَر(چھولیاں دی دال)؟”
میں آکھیا،”میں ایہہ سوچ رہیاں کہ پاکستاں نوں تُسیں تے نہیں چلاندے او؟”
اوہنے ہسدیاں ہویاں آکھیا، “اسیں صرف کنگ میکر آں (King Maker)۔ ساڈا کم چھڑا حکومتاں بنانا تے ڈھانا اے۔”
میں آکھیا، “لگدا ہے کہ، انگریزاں نے پاکستان تہاڈے لئی بنایا سی۔”
“فضول بکواس نہ کر، کدھرے توں وی ہور بندیاں وانگوں سدا لئی گواچ نہ جاویں!”
میرے پراسرار سنگی نے کڑکدیاں ہویاں آکھیا، “توں صرف اینا گویڑ لاکے دس کہ میں کون آں۔”
افیئرز دے شکریئے نال

[Total: 0    Average: 0/5]
Spread the love

اپنا تبصرہ بھیجیں